Editorial preface

Abstract

Íslenska þjóðfélagið: Tímarit Félagsfræðingafélags Íslands hóf göngu sína 1. janúar 2010 og er fjórða útgáfuár þess því nú á enda. Tímaritinu var ætlað að endurspegla fjölbreytileika íslensks þjóðfélags sem vettvangur rannsókna sem nálguðust margvísleg viðfangsefni á grundvelli ólíkra aðferðafræðilega hefða. Það er mat ritstjóra að það hafi að mörgu leyti tekist vel. Þær nítján greinar sem birst hafa í fyrstu fjórum árgöngum tímaritsins spanna allt frá jafnréttismálum til búferlaflutninga, frá afrekísþróttamönnum til atkvæðavægis og frá kúrekamyndum til stéttaskiptingar. Auk framlaga félagsfræðinga er þar að finna framlög fræðimanna á sviði afbrotafræði, kynjafræði, menntunarfræði, stjórnmálafræði, sálfræði, landfræði, viðskiptafræði og hagfræði. Niðurstöður byggja meðal annars á spurningakönnunum, djúpviðtölum, opinberum gögnum, innihaldsgreiningu dagblaða, ljósvakamiðla og fjölmiðla, og kenningalegri greiningu. Um helmingur höfunda er með fasta stöðu við íslenska eða erlenda háskóla en um helmingur starfar á margvíslegum öðrum vettvangi eða stundar framhaldsnám í félagsfræði eða skyldum greinum.