„Kennari þarf áreiðanleg gögn til að geta metið hvort tiltekin hæfni hafi náðst“

Linda Heiðarsdóttir kennari og aðstoðarskólastjóri

Útdráttur

Linda Heiðarsdóttir ólst upp í Laugarneshverfinu í Reykjavík, sótti þar skóla og hóf þar einnig starfsferil sinn, fyrst sem stuðningsfulltrúi, síðan sem grunnskólakennari og loks sem aðstoðarskólastjóri. Ljóst er að skólamenning Laugarneshverfisins hafði djúpstæð áhrif á Lindu, bæði sem barn í skyldunámi og sem verðandi kennara. Þar átti umsjónarkennari hennar fyrstu fjögur skólaárin ríkan þátt. Staðbundið námsskipulag eins og tíðkaðist í kennaranámi Lindu er henni hugleikið; hún bendir meðal annars á kosti þess að hafa tilheyrt bekk eins og þá tíðkaðist og dvelja mikið á staðnum. Tengsl milli nemenda innbyrðis og einnig milli kennara og nemenda hafi reynst mikils virði, og að stunda nám á staðnum með þessum hætti reynst þannig gjörólíkt því að stunda fjarnám, þar sem nemandi mætir kannski sjaldan eða aldrei á staðinn og vinnur hópverkefni á netinu með fólki sem hann hittir hugsanlega aldrei. Hún telur einnig að vettvangsnámið hafi verið mikils virði við að móta hugmyndir hennar sem fagmanneskju. Við upphaf starfsferils Lindu áttu sér stað töluverðar breytingar á skólakerfinu. Ný grunnskólalög tóku gildi og í kjölfarið ný og breytt aðalnámskrá með tilheyrandi grundvallarbreytingum á námsmati. Linda hefur tekið drjúgan þátt í umræðu og vinnu sem fylgt hefur þessum breytingum og starfað þar sem mikilvirkur frumkvöðull. Í viðtalinu ræðir hún bæði eigin framtíðarsýn og fyrirætlanir og einnig væntingar sínar til menntakerfisins í náinni framtíð. Loks er umræðukafli þar sem efni samtalsins er reifað í fræðilegu samhengi og í ljósi þeirra aðstæðna, stefna og strauma sem ætla má að hafi haft og muni í framtíðinni hafa áhrif á fagvitund og starfskenningu Lindu Heiðarsdóttur. Tilgangur viðtalsins var að varpa ljósi á bakgrunn þessa frumkvöðuls og setja hugmyndir hennar og viðhorf í fræðilegt samhengi.